Агенцијата за катастар на недвижности на Република Македонија, како членка на Советот на Националната инфраструктура на просторните податоци на Република Македонија (НИПП) и институција надлежна за воспоставување, одржување и обезбедување на јавен пристап до геопорталот за НИПП за одржување на услуги за метаподатоци, регистар на метаподатоци и обуки поврзани со нив, беше учесник на конференцијата ИНСПИРЕ 2018. Конференцијата се одржа од 18 до 21 септември 2018 година, во Антверп, Белгија, под наслов „Да работиме заедно“, а во организација на Европската комисија, заедно со Холандија и Белгија, како земји членки на Европската Унија.

Целта на конференцијата беше да се продлабочи соработката меѓу членките на Европската Унија и оние што се обврзале да ја имплементираат Директивата ИНСПИРЕ, за што, во согласност со законот за НИПП на Република Македонија, е задолжена Агенцијата за катастар на недвижности. Беа разменети искуства во имплементација на Директивата и беа идентификувани нови политики и иницијативи поврзани со неа, а во однос на слободно споделување на геопросторни податоци и информации на сите нивоа (од локална самоуправа до меѓународна размена на податоци).

Сега, откако имплементацијата на Директивата ИНСПИРЕ и бројните научни, зелени и технички иницијативи се созреани, потребно е да бидат ефективно евалуирани и да се користат, а земјите членки на ЕУ и останатите земји кои се обврзале да ја имплементираат Директивата ИНСПИРЕ, меѓу кои и Република Македонија, да работат во корист на општеството и економијата, споделувајќи ги и користејќи ги податоците, во согласност со правилата и со принципите на кои се темели Директивата.

М.В