/ Прочитано:

887

БЈБ ќе го „чешла“ работењето на ексградоначалникот на Охрид

Понеделник, 27 мај 2013 – Бирото за јавна безбедност, Финансиската полиција и Јавното обвинителство за организиран криминал ќе го испитуваат работењето на поранешниот градоначалник на Охрид Александар Петрески, поради постоење на сомневања за извршен финансиски криминал и корупција.

„Состојбите кои се индикативни укажуваат на постоење на криминални активности во претходното работење во општина Охрид поврзани со работењето на поранешниот градоначалник  Александар Петрески“, изјави новиот директор на Бирото за јавна безбедност (БЈБ)  Митко Чавков по состанокот со охридскиот градоначалник, Никола Бакрачески.

Тој посочи дека утврдиле општи ориентации за работа на тимски пристап заедно со претставници на Финансиската полиција и претставници од други институции во Република Македонија.

„Веројатно многу брзо ќе го прошириме составот со претставници од Јавното обвинителство на Република Македонија, од Јавното обвинителство за организиран криминал и со колеги од СВР Охрид“, додаде Чавков.

Меѓу другото, првиот човек на Бирото за јавна безбедност оствари средба и со СВР Охрид, каде беа договорени конкретни мерки за подигнување на безбедноста во текот на туристичката сезона. Како што укажа, нема да се има толеранција кон оние кои го нарушуваат јавниот ред и мир и придонесуваат туристите да се чуствуваат небезбедно.

„Една темелна анализа која веќе ни е подготвена ке биде основа за интензивни мерки и активности во престојната сезона. Фокусот ке ни биде јавниот ред и мир, криминалитетот и сообраќајот“, вели Чавков.

Недомаќинското работење и долговите на јавните претпријатија под капа на општината веќе ги обелоденија новите директори.  Се претпоставува дека Охрид должи над педесет милиони евра.

Фото: Охрид Прес