/ Прочитано:

1.654

„Евробарометар“: Македонските граѓани со најмала доверба во полицијата и војската

Граѓаните на Македонија имаат најмала доверба во полицијата меѓу сите членки на ЕУ и државите кандидати за членство, покажува истражувањето на „Евробарометар“. Доверба во полицијата имаат 34 проценти од Македонците, додека 61 отсто не ѝ веруваат. Најголема доверба во полицијата имаат Финците 95 отсто, Данците 93 и Швеѓаните 87.
По Македонија, најмала доверба во полицијата има во Словачка 43 проценти, во Бугарија 44, во Црна Гора 47 и во Србија 48 проценти.

Македонците имаат најмала доверба и во војската. Речиси 51 отсто од испитаниците кажале дека имаат доверба во војската, а 41 отсто немаат. Најголема доверба и во националните армии повторно имаат Финците 95 отсто, а потоа Данците и Французите со 88 отсто.

Генерално во ЕУ, доверба во војската имаат 75 отсто од граѓаните, 19 отсто немаат доверба, а шест отсто се без став за ова прашање, покажуваат податоците на „Евробарометар“, како што пренесуваат „Ал џезира“ и „Балтиктајмс“.
Истражувањето на „Евробарометар“ е спроведено во мај годинава и направени се споредби со истражувањето од ноември лани, период во кој се случија повеќе настани на политичката сцена во Македонија. Кај граѓаните на Македонија, поради политичката криза и насилствата во Собранието на 27 април, забележан е значителен пад на довербата во полицијата за седум отсто, додека довербата во војската паднала за два процента.