/ Прочитано:

763

Крај на деценискиот банкарски спор меѓу Љубљана и Загреб, отстранета пречката за членство на Хрватска во ЕУ

Понеделник, 11 март 2013 – Љубљана и Загреб денеска и официјално го потпишаа договорот за решавање на стариот банкарски спор, отстранувајќи ја на тој начин пречката која се закануваше да го блокира членството на Хрватска во ЕУ.

Хрватска се очекува да се приклучи кон ЕУ на 1 јули и денешниот договор го отвара патот Словенија да го ратификува договорот за членство на својот сосед во Унијата до овој датум.

Двете поранешни југословенски републики долги години се во спор за штедните влогови во поранешната словенечка „Љубљанска банка“ од времето на СФРЈ.

Со договорот, кој го потпишаа премиерите на двете држави, се предвидува Хрватска да ги повлече тужбите против Словенија по ова прашање, кое конечно ќе се реши како дел од преговорите за наследството на СФР Југославија со помош на Банката за меѓународни порамнувања.