/ Прочитано:

2.041

Кривичниот суд за определувањето мерка притвор за Ристовски и Јанакиески

Кривичниот суд објави соопштение за определувањето притвор за Спиро Ристовски и Миле Јанакиески во врска со истражната постапка на ЈОРМ за настаните во Собранието. Истражната постапка е против пет лица за кои постои основано сомневање дека сториле кривично дело – Терористичко загрозување на уставниот поредок и безбедноста, предвидено и казниво по членот 313 од Кривичниот законик.

„Постапувајќи по предлог на Јавното обвинителство за гонење организиран криминал и корупција за определување мерка притвор против три лица, кои беа спроведени во судот, судија на претходна постапка по сослушување на лицата како и ценење на фактите и доказите приложени во предлогот, донесе решенија со кои го прифати предлогот на обвинителството и на М. Ј. и С. Р. им определи мерка притвор во траење од 30 дена заради постоење на основите од член 165 став 1 т. 1 и т. 2, додека Т. В. дополнително ќе биде повикан во судот откако Собранието на РМ ќе се произнесе за неговиот имунитет“, се вели во соопштението на Кривичниот суд.

Вчера Јавното обвинителство објави дека се под истрага организаторите на настаните во Собранието. Ценејќи дека се исполнети законските основи, соопштија од ЈОРМ, надлежниот јавен обвинител до судија на претходна постапка при Основниот суд Скопје 1 – Скопје достави Предлог за определување мерка притвор за осомничените.

„Наодите од предистражната постапка укажуваат дека осомничените на почетокот на 2017 година подготвиле и реализирале план со намера да оневозможат мирно примопредавање на власта. За таа цел ги организирале и материјално ги поддржале масовните протести, најпрвин пред Државната изборна комисија, а потоа и протестите на движењето ‘За заедничка Македонија’, кои кулминираа со насилното влегување во Собранието на Република Македонија на 27 април 2017 година“, велат од Обвинителството.

ЈОРМ: Под истрага организаторите на настаните во Собранието

М.В