/Прочитано:

318

Министерот за правда очекува методологијата за прочистување на судството да биде усвоена на 28 декември

Министерот за правда, Бојан Маричиќ, во обраќањето на онлајн конференцијата „Следна станица: Европа“, објави дека очекува на 28 декември Советот за реформи во судството да ја усвои методологијата по која следната година ќе се изврши филтрација во судството и во обвинителството.

„Рецидивите од минатото, попречувачите на правдата не може да бидат дел од правосудниот систем и да носат пресуди во името на граѓаните и не може да ги штитат и да ги унапредуваат нивните права. Потребна е временска рамка, односно рокови во кои ќе се изврши ова прочистување и ќе се одвојат чесните од нечесните судии и обвинители. Очекувам дека на 28 декември Советот за реформи во правосудството ќе ја усвои методологијата по која ќе се изврши филтрацијата на судството и на обвинителство“, потенцираше Маричиќ.

Министерот кажа и дека многу меѓународни извештаи конкретно посочиле на одредени состојба во правосудството, за кои е потребно да се види дали има намерно прикривање на предмети, намерно застарување на предмети, дали се постапило неправедно и дали некој бил заштитен.

Министерот на конференцијата информираше дека оваа и минатата година, според податоците на Судскиот совет биле разрешени вкупно осум судии, а постапка е поведена против вкупно 83 судии.

М.В