Министерството за финансии информира дека официјално ќе се обрати до „Пејпал“ за да се отпочне постапката за воведување на услугата „прием на пари” во Македонија преку платежниот сервис „Пејпал“.

Ова е заклучокот од вчерашната средба што се одржа во Министерството за финансии, а на која присуствуваа претставници од Министерството, министерствата за економија и за информатичко општество и администрација и од четири банки во Македонија.

„Со ова ќе се овозможи македонските граѓани и фирми да продаваат свои производи и услуги на светските пазари и да вршат прием на плаќања преку ‘Пејпал’“, се вели во соопштението што денеска беше објавено од страна на „Логин системи“ кои се иницијатори за воведување на пејпал-услугата.