Продолжуваат антивладините протести во Романија. Европската комесарка за правда, Вера Јoурова, ја повика романската влада да ги преиспита и ревидира новите закони за правосудство кои ги предизвикаа масовните протести во земјата.

Протестите на кои имаше жестоки судири помеѓу полицијата и граѓаните што протестираат се насочени против корупцијата и против воспоставувањето законодавство кое се заканува на независноста на судството. Граѓаните бараат оставка од социјалдемократската влада и оставка од премиерката Вјорика Данчило.

Романскиот претседател Клаус Јоханис, критичар на владата, нагласи дека „остро ја осудува бруталната интервенција на полицијата за нередите“, додавајќи дека е „непропорционален одговор на протести кои се претежно мирни“.

Како што пренесуваат медиумите, на антивладините протести има над 400 повредени граѓани. Покрај револтот од полициската бруталност, на протестите граѓаните бараат демократија и закони кои ќе ги штитат граѓаните, а не политичарите.

Според нив, реформите во правосудството предложени од владата се создадени  да им служат и да ги штитат интересите на политичката елита. Овие закони  ја загрозуваат независноста на судството и ја поткопуваат довербата во судскиот систем.

Кај Романците незадоволство постои и од измените на Кривичниот законик и отстранувањето на шефицата на Националната дирекција за борба со корупцијата, Лаура Кодруца Ковеси, која апелираше до романската јавност дека корупцијата може да биде поразена и дека граѓаните не треба да се откажуваат од таа борба.