Државниот санитарен и здравствен инспекторат е во исклучително незавидна положба, поради тоа што располага со мал број кадар, а и техничките ресурси се дотраени, информираше денеска директорката на оваа институција, д-р Ирина Сотирова Бухова.

„Мојот впечаток е дека досега воопшто не е вложувано во Државниот здравствен и санитарен инспекторат. А она што оваа институција ја прави различна од другите инспекторати во државата е тоа што вршители на должноста инспектори може да бидат само доктори на медицина и стоматологија. Покрај ова, незанемарлив е фактот дека Државниот санитарен и здравствен инспекторат постапува, односно дејствува дури според 33 закони. Наспроти овие информации, кои се однесуваат на обемноста на нашето поле на работа, како и на профилот на кадарот, морам да ве информирам дека во моментов бројот на вкупно вработени во Државниот санитарен и здравствен инспекторат е 70 луѓе. Од нив само 30 се државни инспектори кои имаат лиценца за самостојни надзори на терен, а треба да дејствуваат на територијата на цела Македонија“, истакна директорката Бухова.

Таа на денешната прес-конференција истакна и дека од тие 30 инспектори, девет се на возраст од 54 до 59 години, а 11 се на возраст од 59 до 67 години, што, како што потенцираше, доколку не се преземат итни мерки, односно не се вработи дополнителен кадар, во наредните неколку години Државниот санитарен и здравствен инспекторат ќе остане само со десет инспектори.

„Во Државниот санитарен и здравствен инспекторат има уште 12 лиценцирани инспектори кои имаат соодветно образование, но не излегуваат на терен. Според проценките, потребни се дополнителни 500 евра месечно за сите нив за да може да бидат ангажирани на терен. Што се однесува до техничкиот потенцијал, располагаме со 30 возила од кои една третина се од марката ‘југо’ кои се постојано во некаков дефект и не се безбедни за здравствените инспектори кои треба да излегуваат на терен со нив“, појасни Бухова.

Таа јавно порача дека ќе стори сè за да има итни вработувања во ДСЗИ, кои се неопходни, а нагласи дека во секој град мора да има најмалку по двајца инспектори за да се дејствува успешно на територијата на цела држава.

„Ќе бараме да се измени и законската регулатива, според која од вработување во инспекторатот до стекнување на лиценца за самостоен здравствен инспектор треба да минат пет години. За да може инспекторатот да работи како што треба во секој град треба да најмалку по двајца инспектори“, истакна директорката на ДСЗИ.

Бухова нагласи и дека нема да толерира закани, притисоци или уцени кон вработените од одредени структури, па макар тоа биле и од власта, бидејќи, како што рече, приоритет на Државниот санитарен и здравствен инспекторат е здравјето на граѓаните.

„Државниот санитарен и здравствен инспекторат цврсто ќе стои на своите одлуки и нема да го промени својот извештај, под какви било јавувања, притисок или закани. Институцијата нема да потклекне на притисоци, јавувања и ургенции, а нема ниту да амнестира никакви и ничии пријатели, па ни на власта, кога ја загрозуваат здравствената состојба на граѓаните. Сите се еднакви пред законот и за сите ќе има одговорност доколку го загрозат здравјето или животот на граѓаните“, порача директорката на ДСЗИ.

Таа најави дека ќе воведе 24-часовна линија за пријави и забелешки од граѓаните во целата земја по кои ќе постапува.

А. Б.