За љубовта кон правото разговараме со Росица Ефтимовска, правник и менаџер за правни обуки во Академик.

Кога започна твојата љубов во правото?

Начинот на кој јас го засакав правото е баш наивен и неповрзан со неговата суштина. Имено, уште кога бев малечка, мислам дека сѐ уште не бев тргната на училиште, или пак одев во основно училиште, гледав филмови во кои имаше судски процеси. Им се воодушевував на судиите, на нивниот последен збор и на тропотот со чеканчето. Уште тогаш посакував да го работам тоа и еден ден решив дека ќе се занимавам со право. До денешен ден многу го почитувам судот како институција и навистина ми е криво кога ќе видам дека правосудниот систем кај нас некогаш разочарува. Не сакам да верувам дека професионалноста и етичките вредности кај нас недостасуваат. Тоа го сфаќам како личен пораз, не знам ни самата зошто. Неуморно верувам во правото и правдата, а така и лично функционирам.

Зошто го сакаш правото, што е тоа што ја одржува оваа љубов?

Затоа што сакам ред, сакам правила и принципи, сакам рокови, сакам добро организиран систем на функционирање, а сето тоа го наоѓам во правото. Во исто време правото е моја мисла која трае долго и која ме предизвикува да се сретнеме, некогаш дури и длабоко во ноќта, баш како вистинска љубов. Правото го сакам затоа што не е егзактна наука и затоа што создава простор за докажување, за надмудрување и за толкување, толкување за кое можеби и не постои конечна завршна точка. Им се воодушевувам на солидно и убаво напишаните коментари на законите, по чие читање навистина нема што да се додаде или да се праша. Според моето мислење, тоа го можат само големите умови.

Што би им порачала на оние што не се правници?

Па, би им кажала дека правото воопшто не е здодевно, напротив многу е забавно и игриво. Пребарувањето низ законските текстови, логиката за спојување на различните, но поврзани материјални и процесни закони и препознавањето на точките на нивно сретнување е вистинска гимнастика за умот. Ние правниците на долго и широко зборуваме и објаснуваме, но не за да бидеме напорни и да го одвлекуваме вниманието од важните моменти, туку затоа што сѐ уште ја разложуваме задачата поставена уште одамна во која 2 + 2 не се 4.

• „Од дете се бунтувам за правда“ – Маја Ристова, адвокат
• „Правниците отсекогаш биле носители на интелектуалните движења и промени“ – Иван Дургутов, магистер по право
• „Правото има метафизичка димензија која треба да се почувствува“ – Дарко Павловски, национален правен офицер во Мисијата на ОБСЕ во Скопје
• „Правото, а особено адвокатурата е креативна професија за оние кои го сакаат и го владеат правото“ – Кристијан Поленак, адвокат
• „Бидете правници со интегритет!“ – Александра Груевска-Дракулевски, професор и продекан за настава на „Јустинијан Први“
• Силјановска: Мојата љубов кон правото беше сократовска
• Уранија Пировска: „Љубовта кон правото е љубов кон правдата“
• „Никогаш не предавајте се затоа што промената почнува од вас самите“ – Дитурие Елези-Незири, судијка во Управниот суд
• „Сите знаења на правниците треба да бидат употребени за подобрување на правната држава“ – Андреј Божиновски, правен советник
• „Ако правото е љубов, адвокатурата е страст“ – Петро Јанура, адвокат
• „Без бескрајната љубов кон правото и кон адвокатурата невозможно е да се издржат сите притисоци“ – Петар Трајковски, адвокат
• „Љубовта кон правото нѐ прави истрајни дека правото ќе надвладее“ – Рамије Абдурахими-Цара, судијка во Управниот суд
• „Неуморно верувам во правото и правдата“ – Росица Ефтимовска, менаџер за правни обуки во Академик
• Интервју за љубовта кон правото со тимот адвокати од „Георги Димитров адвокати“
• Наташа Габер-Дамјановска за љубовта кон правото: Привлечност на предизвикот да се изнајде адекватно правно решение