Министерката за правда, Рената Дескоска, се обрати на Осмата сесија на Конференцијата на државите потписнички на Конвенцијата на Обединетите нации против корупцијата. Конференцијата се одржува на секои две години, а целта на одржувањето е проверка на напредокот на државите потписнички на Конвенцијата.

Конвенцијата на Обединетите нации против корупцијата е дел од македонскиот правен поредок, а нејзината имплементација е предмет на ревизија.

„Корупцијата претставува закана за демократијата и за владеењето на правото. Општествата со силни, независни и непристрасни механизми за борба против корупцијата се општества со значително подобар квалитет на живот. Прочистувањето на корупцијата во општеството е мошне предизвикувачки процес, но тоа е најзначајниот процес во една држава кој води кон подобро образование, здравство, административни услуги, подобар и поеднаков пристап до правда за нашите граѓани“, истакна Дескоска.

Во своето обраќање, министерката Дескоска ги наведе постигнувањата на Министерството за правда во насока на зајакнување на антикорупциската рамка и имплементација на препораките на Конвенцијата на ООН против корупција, а како најзначајно постигнување го наведе донесувањето на новиот Закон за спречување на корупцијата и судирот на интереси.

„Како резултат на дискусиите и експертските препораки добиени во рамките на спроведувањето на вториот циклус на преглед на имплементацијата на Конвенцијата, воведена е целосно транспарентна постапка за  избор и именување на претседателот и членовите на Државната комисија за спречување на корупцијата,  во која учествуваат граѓанскиот сектор, новинарите и медиумите, а утврдени се и зајакнати услови кои треба да ги исполнуваат кандидатите за претседател и член на оваа комисија“, потенцираше Дескоска.

Со новиот Закон за слободен пристап до информации од јавен карактер од мај 2019 година се зголемува пристапот до информации, а рокот за добивање одговор е значително скратен.

Како придобивка, министерката Дескоска ја наведе и зголемената транспарентност во трошењето на јавните средства, особено преку објавување на интернет-порталот „Отворени финансии“, со кој јавноста има увид во податоците за реализација на буџетските трансакции.

Министерката истакна дека добрите практики и предизвиците идентификувани од тековниот циклус на преглед на имплементацијата на Конвенцијата ќе се користат за аргументирање и за предлагање на подобри решенија за превенција и борба против корупцијата, но тие ќе послужат и како референца за поддршка во активностите за обезбедување техничка помош.

Дескоска им се заблагодари на Канцеларијата на Обединетите нации против наркотици и криминал и на граѓанскиот сектор за експертската поддршка што ја обезбедуваат во унапредување на имплементацијата на одредбите од Конвенцијата.

М.В