Тринаесет лица беа приведени по синоќешните протести кои се случија како реакција на одлуката на претседателот на Република Македонија Ѓорге Иванов за помилување политичари, нивни соработници и поддржувачи заради помирување помеѓу политичките партии и решавање на политичката криза.

Во протестите беше демолирана Народната канцеларија на Претседателот на Република Македонија која се наоѓа во центарот на Скопје и беа искршени дел од прозорите на зградата на Министерството за правда.

При судирот меѓу полицијата и демонстрантите, беа повредени неколку лица, меѓу кои и новинарот на редакцијата на порталот „Плусинфо“,  Горан Наумовски и фоторепортерот на „Вечер“ Наке Батев.

Во официјалната информација од полицискиот билтен е наведено дека во текот на вчерашниот ден имало два протести, едниот пред зградата на Специјалното јавно обвинителство, а другиот пред седиштето на политичката партија СДСМ.

„Во 19:15 часот пред Собранието на Р Македонија се собрале околу 3 000 граѓани, а пред канцеларијата на Претседателот на Р Македонија на ул. Димитрија Чуповски –  околу 2 000 граѓани. Дел од граѓаните собрани пред канцеларијата на Претседателот фрлале камења, јајца, како и чадни бомби кон објектот. Притоа биле оштетени неколку прозорски стакла“, се наведува во полицискиот билтен.

Подоцна во 19:40 часот, според информациите на МВР,  дел од масата од пред канцеларијата на Претседателот се упатила пред Собранието на Република Македонија, а масата граѓани од пред Собранието се упатила кон ул. „Павел Шатев“.

„Околу 21:00 часот дел од масата која била пред канцеларијата на Претседателот, успеала насилно да влезе во просториите од каде што изнела дел од инвентарот и го запалила на улицата пред објектот. Дел од истата маса на објектот на Министерството за правда со тврди предмети ја оштетиле влезната врата и неколку прозори. Нарушителите биле потиснати и оддалечени од објектот, а 13 од нив се приведени“, потврдуваат од МВР.

По целосно документирање на случајот од МВР најавуваат соодветни поднесоци.

Секторот за внатрешна контрола и професионални стандарди  при МВР и СВР Скопје уште од синоќа имаат задача да испитаат дали е употребена прекумерна полициска сила на протестите, истакна министерот за внатрешни работи, Оливер Спасовски.

„Апелирам до новинарите да бидат видно обележани во вакви ситуации. Доколку се утврди прекумерна употреба на сила , секој ќе сноси одговорност“, рече Спасовски.

Покрај тоа Спасовски апелираше до граѓаните мирно да протестираат и да се воздржат од насилство, а полицијата да ја третираат како чувар на безбедноста.

М.С.