Пресуда на Стразбур во корист на граѓаните на кои им беше наметнато да плаќаат за парно греење иако не го користат
Европскиот суд за човекови права донесе пресуда во корист на граѓаните на кои им беше наметнато да плаќаат за топлинска енергија иако не ја користат.
Како што посочува ЕСЧП, граѓаните како сопственици на станови се жалеле дека противправно им е наметната обврската да плаќаат за парното греење во колективните објекти за домување, односно во зградите во кои живеат, со што им се нарушиле загарантираните права за мирно уживање на сопственоста, на што всушност и упатува Европската конвенција за човековите права.
Во овој случај, се наведува во пресудата на ЕСЧП, има повреда на членот 1 од Протоколот 1 на Европската конвенција за човековите права, во кој се пропишува дека секое физичко или правно лице има право на мирно уживање на својот имот. Пред Европскиот суд за човекови права жалителите се застапувани од адвокатите Александар Варела, Данче Чакаровска-Гроздановска и Игор Спировски.
М.В
