Третото повторено судење за случајот „Ровер“ во кој како обвинет се јавува и поранешниот министер за внатрешни работи Љубе Бошковски, никако да започне. И денеска судијата Илија Трпков го одложи закажаното рочиште поради отсуство на обвинетиот Сашко Јовановски.

Неговиот бранител информираше дека Јовановски е повреден на левата нога и дека посетува физикална терапија поради што не може да доаѓа на рочиштата. Тој приложи и медицинска документација пред судот, но обвинителката во случајот, Лидија Раичевиќ-Вучкова, побара да биде приложен дополнителен наод од специјалист како доказ за здравствената состојба на обвинетиот.

Следното рочиште за предметот е закажано за 9 мај.

Ова е третпат одново да почнува судењето за „Ровер“ бидејќи Апелациониот суд Скопје двапати ја укинува првостепената пресуда поради низа пропусти и поради неутврдена фактичка состојба.

Со пресудата на Кривичниот суд, Предраг Чубрило, Милан Илиќ и Милорад Ковачевиќ добија казна доживотен затвор, Вук Вукичевиќ доби 15 години затвор, Бошкоски доби затвор од 10 години и шест месеци, првиот човек на обезбедувањето на Бошкоски, инспекторот Зоран Трајковски, доби осум години и шест месеци, по седум години добија Сашко Јовановски и Ивица Ристиќ, а по пет години и шест месеци Гоце Митревски и Никола Негриевски.

Обвинетите се товарат за убиствата на Марјан Тушевски и Киро Јанев што се случија во Скопје, во јули 2001 година.

М. С.

(ОБНОВЕНО) Според судијата во „Ровер“ нема пречки Бошковски да излезе од „Идризово“

ДИРЕКТОРОТ НА „ИДРИЗОВО“: Судијата во „Ровер“ се меша во работењето на затворот