/ Прочитано:

1.076

РСБСП: Почитувајте ги сообраќајните правила и прописи и не занемарувајте ги временските услови

 

Познато по високите температури, убавото време, годишните одмори и омилените патувања, летото е период од годината што сите со нетрпение го очекуваме. Оваа година, велат од Републичкиот совет за безбедност на сообраќајот на патиштата, имаме малку поинакво, нетипично лето, со променливо време, со многу врнежи и со променливи температури. Во вакви временски услови возењето е отежнато, специфично и иако се работи за лето, условите се посебни и бараат посебен начин на возење.

Републичкиот совет за безбедност на сообраќајот на патиштата советува добро да се подготвите пред да тргнете на пат. Одморете се добро, проверете ја техничката исправност на возилото, проверете ги гумите, проверете го притисокот на воздухот во нив, проверете ги бришачите затоа што во услови на дожд и лошо време ќе ви бидат повеќе од потребни. Проверете ги светлата, маслото во моторот и најважно од сѐ проверете ја временската прогноза за денот кога планирате да патувате.

Доколку во текот на патувањето времето е облачно и тмурно, со некој зрак сонце, препорачливо е да носите со вас очила за сонце за да не го напрегате видот, односно за да не се заморите прерано.

Доколку, пак, за време на патувањето ве фати невреме проследено со обилни врнежи од дожд, со грмотевици и ветер, тогаш задолжително следете ги следните совети:

Забавете. Намалете ја брзината на движење за 10 или 20 км/ч. При поголеми брзини, автомобилот го губи контактот со подлогата, се подига од патот и се однесува како да скија на вода. Ако се случи тоа, не паничете. Единствено што треба да направите е да забавите до онаа брзина кога автомобилот ќе го чувствувате нормално.

Избегнувајте возење низ поплавени делови (улици, области). Проблемот ќе настане кога нема да можете да ја процените добро длабочината на водата и таа ќе навлезе длабоко во вентилот за довод на воздух, а потоа и во моторот и автомобилот ќе изгасне.

Ослободете ги сопирачките откако ќе поминете низ вода (вир, бара). Тргнете го стапалото од педалот за гас. Ова создава топлина и триење што помага да се исушат сопирачките.

Запрете. Кога дождот е многу силен и видливоста преку ветробранското стакло е намалена до 50 метри, запрете. Тргнете се настрана и почекајте да се намали интензитетот на врнење.

Многупати, и покрај тоа што сте ги примениле сите совети за возење во услови на дожд, сепак, може да настане проблем со возилото и да останете дефект на патот. Во тој случај, РСБСП ви советува:

Осигурете се дека автомобилот е надвор од сообраќај на патот. Тргнете го настрана и вклучете ги трепкачите. Обезбедете ја околината со триаголник или со конуси. Внимавајте тие да бидат поставени на соодветно и пропишано растојание.

Не излегувајте од возилото. Побарајте помош и почекајте во возилото. Доколку сакате сами да се соочите со проблемот на возилото, почекајте да престане врнењето, облечете рефлектирачки елек и бидете внимателни.

Условите за возење, особено во лето, се менуваат многу брзо. По дождот се појавува сонцето, водата испарува и се јавува нов проблем за возачите – магла. Иако оваа магла не е толку густа и опасна како маглата во зима, сепак, бидете претпазливи, вклучете ги магленките навреме и намалете ја брзината пред да навлезете во маглата. Ова ќе ги предупреди и другите возачи да ја намалат брзината. Особено бидете внимателни кога возите по угорнина, по рид или низ планинско место. Намалете ја брзината пред да почнете да го качувате ридот. Можноста да има запрен автомобил, одрон на карпа или колона возила е голема, а поради маглата нема да имате можност да ги видите навреме.

Внимателното возење е клучно за безбедноста на секој учесник  во сообраќајот, а одговорноста при возењето е одлика на карактерот на секој возач и придонесува за безбедно одвивање на сообраќајот.

Од РСБСП повторно со апел: „Почитувајте го сообраќајот, почитувајте ги правилата и прописите, не занемарувајте ги временските услови, предупредувањата од метеоролозите и моменталните услови на патот. Возете внимателно, бидете одговорен возач.“