/ Прочитано:

1.377

РСБСП: Важни совети како да го управувате возилото по снежни и замрзнати коловози

Возењето автомобил во зимскиот период, особено кога има снег, за голем дел од возачите преставува проблем, што и не треба да зачудува бидејќи во многу нешта се разликува управувањето на возилото во зимски услови отколку во другите годишни времиња. Како да се стартува возилото, како да се управува  и како да се кочи на снег и на замрзнати површини се возачки вештини кои малку  се учат во автошколите  и единствено можат да се стекнат со искуство.

Возењето по снег, замрзнати патишта и силен ветер и проблемите и  ризиците  со управувањето  на возилото и застанувањето на лизгав пат ќе се сведат на минимум  доколку се почитуваат  пораките  и советите  од искусните возачи, а тоа се:

Внимателно – побезбедно

Прво и основно правило за возење по снег е внимателност. Сите промени, без разлика дали е во прашање промена на правецот или на брзината, потребно е да се прават внимателно, без брзање и со големо чувство бидејќи наглите промени можат да доведат до губење на контролата над возилото.

Тргнување

Кога возачот ќе го исчисти автомобилот од снег и од мраз, може да седне во него, да го стартува моторот и да тргне. Доколку пред автомобилот и пред гумите има многу снег, потребно е да се отстрани. На возачите со недоволно искуство најголем проблем им е да тргнат од место поради снегот кој се наоѓа околу возилото. Затоа во услови на снег и мраз потребно е да се даде гас, но педалот за менување на брзина треба да се испушта многу побавно и повнимателно отколку што тоа се прави на сува површина, и на тој начин погонските тркала во целост би ја зафатиле лизгавата подлога и би можеле да го придвижите автомобилот.

Пролизгување

За возење по лизгав пат се применуваат други  техники  за разлика од управување на возилото по суви површини. Во пракса може да се почувствува дека малку поголема брзина доведува до ненадејно лизгање на погонските тркала. Доколку се најдете во таква ситуација, единствена помош е да ја намалите брзината, никако нагло туку полека и внимателно тргнете ја ногата од педалот за гас. Сопирачките  треба да се  користат само во неопходни ситуации, внимателно и постепено.

Менување брзини  и управување со автомобилот

При менување на брзината, педалот за гас потребно е да го испуштате многу внимателно (наглото испуштање може да го пролизга автомобилот), педалот за куплунг да се притиска нежно, да се смени брзината, полека да се испушти педалот за куплунг и истовремено да се додаде гас, но многу малку гас, значително помалку отколку што тоа го правите на сув пат. Важно е да знаете  дека при промена на правецот треба да се избегнува одземање или додавање на гас бидејќи и во двата случаи може да се случи автомобилот да се пролизга.

Кочење

Во случај на поголема брзина во кривина, автомобилот по правило се обидува да го задржи правецот на движење (кој во кривина води надвор од коловозот). Во ваков случај, најпрво што треба да направите е да ја тргнете ногата од педалот за гас и на тој начин ќе дозволите предните гуми да престанат со лизгање. Најголема грешка кај повеќето возачи е што во такви ситуации уште посилно го вртат управувачот  во кривината и панично притискаат на кочницата, а всушност треба да се прави спротивното. Кочењето е дозволено само во крајни и безизлезни ситуации, а во случај автомобилот да се движи право во кривина, додатното вртење на гумите може уште повеќе да ги блокира тркалата. Кога возачот ќе ја тргне ногата од педалот за гас и ќе почувствува дека предните тркала се вртат и дека автомобилот може да се управува, потребно е повторно да сврти во правец на кривината, но никако премногу силно, туку онолку колку што е потребно.

РСБСП со апел: Внимателно и безбедно управувајте со својот автомобил и приспособете ја брзината на условите на патот!