За развој, организација и управување на единствена образовна и истражувачка телекомуникациска мрежа во Република Македонија се основа Македонска академска истражувачка мрежа (МАРнет) како јавна установа која врши дејност од јавен интерес.

 МАРнет ги врши следниве работи и задачи: 

•  ја води затворената телекомуникациска мрежа,
• го поттикнува развојот на затворената телекомуникациска мрежа,
•  планира, организира и управува со врските меѓу корисниците на телекомуникациските услуги,
•  ги води, управува и изведува работите за набавка и изнајмување на потребната програмска, материјална и комуникациска опрема,
•  организира и изведува обуки и дава стручна помош на корисниците на телекомуникациските услуги,
• управува со македонскиот домен (домен mk),
•  обезбедува членство и соработка со соодветни меѓународни организации,
•  врши комјутерски активности поврзани со истражување и експериментален развој во природните и во техничко-технолошките науки,
• врши работи поврзани со софтвер (подготвува, издава, дава консултации),
•  врши консултации во врска со хардвер,
•  води база на податоци и обработува податоци,
•  води единствен Регистар на регистрирани поддомени во МК-доменот (во натамошниот текст: Регистарот),
•  одржува телекомуникациски системи во затворената телекомуникациска мрежа,
• врши издавачка дејност поврзана со остварувањето на телекомуникациските услуги,
• врши работи кои се однесуваат на репродукција на комјутерски медиуми;
•  врши услуги на затворената телекомуникациска мрежа за изведување на програмите на образовните дејности;
•  врши работи кои се однесуваат на поврзување на затворената телекомуникациска мрежа на корисниците на телекомуникациските услуги;
•  обезбедува стручно и техничко поврзување со сродни телекомуникациски мрежи во странство и
•  воспоставува, одржува и развива соработка со други телекомуникациски мрежи во Република Македонија и во странство.