Посебен додаток како паричен надоместок може да се обезбеди за дете, државјанин на Република Македонија со специфични потреби кое има пречки во телесниот или менталниот развој или комбинирани пречки во развојот до 26 години живот.

Наод, оцена и мислење за потребата од остварување на посебен додаток дава стручен орган за оцена на видот и степенот на попреченоста на лицата во менталниот или телесниот развој.

Дете со пречки во развојот и со специфични потреби е:

• со тешка, потешка или најтешки пречки во телесниот развој;
• со умерена, тешка или длабока ментална попреченост,
• со најтешки облици на хронични заболувања;
• најтежок степен на оштетување на видот, слухот или говорот (слепо лице и практично слепо лице; практично глуво и тотално глуво лице;
• лице со потполно отсуство на говорот, лице со тешко оштетен говор поради детска парализа, лице со аутизам, лице со оштетен или изгубен порано стекнат говор) и
• со повеќе видови на пречки (комбинирани) во развојот.

Доколку целосно не е институционално згрижено на товар на државата еден од родителите на детето, старателот или лицето на кое со решение на надлежниот центар за социјална работа му е доверено детето и живее во семејство со него може да побара паричен надоместок за посебен додаток.

Корисникот на посебниот додаток треба да биде државјанин на Република Македонија со постојано место на живеење во Република Македонија последните три години пред поднесувањето на барањето.

Висината на посебниот додаток изнесува 4.346 денари.

Износот се усогласува со порастот на трошоците на живот за претходната година објавени од Државниот завод за статистика, во јануари за тековната година.

Опис на постапката

Постапката за остварување на правото на посебен додаток се поведува по писмено барање на родителот, односно старателот на детето или лицето на кое со решение на надлежниот центар за социјална работа му е доверено детето и живее во семејство со него.

Барањето се поднесува до центарот за социјална работа, надлежен за подрачјето на кое подносителот на барањето има живеалиште.

По жалба против решението на центарот за социјална работа решава министерот за труд и социјална политика.

Жалбата не го одложува извршувањето на решението.

Поднесувачот на барањето е одговорен за вистинитоста на податоците во барањето.

Предвиден рок за постапката: oд 2 до 6 месеци.

Потребни документи

• Барање за обезбедување на посебен додаток;

• Извод од матична книга на родените на детето;

• Уверение за државјанство на детето;

• Наод и мислење за видот и степенот на попреченоста во физичкиот или психичкиот развој и специфичните потреби на детето;

• Решение за категоризација од Центарот за социјална работа;

• Потврда од Центарот за социјална работа дека детето не е институционалано згрижено на товар на државата и

• Лична карта на подносителот на барањето(фотокопија) со оригинал на увид.