Занаетчијата престанува да врши дејност и се брише од Регистарот на занаетчии:

1. со одјавување и
2. по сила на закон.

За престанок на дејноста на занаетчијата со одјавување, комората донесува решение врз основа на писмено барање на занаетчијата.

Промената на седиштето на занаетчијата од подрачјето на една комора во друга комора се смета за престанок на вршење на дејноста на занаетчијата со одјава.

Како ден на престанување на вршење на дејноста се смета денот на поднесување на барањето.

Решението за престанок на дејноста се запишува во Регистарот на занаетчии.

Занаетчијата престанува да ја врши дејноста по сила на закон во следниве случаи:

• ако засновал работен однос, се пензионира или отпочнал со вршење на друг деловен потфат;
• ако е на издржување казна затвор во траење подолго од шест месеца;
• со правосилна судска одлука или правосилно решение му биде изречена мерка за безбедност забрането на вршење на дејноста подолго од шест месеца;
• смрт и
• други случаи предвидени со закон.

За престанок на дејноста по сила на закон, комората донесува решение за бришење на уписот од Регистарот на занаетчии.

Комората ќе го огласи решението за ништавно и ќе го брише занаетчијата од Регистарот на занаетчии, ако дополнително утврди дека занаетчијата го добил решението за упис во Регистарот на занаетчии врз основа на лажни докази.

Потребни документи

• Барање зае престанок на дејноста занаетчија;
• Решение за извршен упис во Занаетчиски регистар на Занаетчиска Комора (оригинал);
• Уверение од УЈП за платен данок;
• Лична карта (фотокопија);
• М1-М2 обрасци (оригинал);
• Образец ЗО-1 (за здравство);
• Печат;
• Уплата во износ од 3.500,00 денари и
• Уплата за коморски придонес во износ од 4.800,00 денари за реално одданочени занаетчии или 2.400,00 денари за паушално одданочени занаетчии.