Занаетчијата може привремено да запре со вршењето на дејноста во случај на:

• болест, додека трае неспособноста за работа;
• служење, дослужување на воената обврска или учество во воена вежба додека трае служењето на воената обврска;
• адаптација и реконструкција на просториите за работа до три месеца, еднаш во годината;
• користење на годишен одмор;
• притвор, издржување на казна затвор до шест месеца, изречена казна забрана за вршење дејност до шест месеца и
• намален обем на работа до три месеца, еднаш годишно.

 Во случај кога запирањето на дејноста трае помалку од 30 дена, не се смета како привремено запирање.

 Привременото запирање по сите основи не може да биде подолго од 6 месеци во текот на годината.

 Опис на постапката

Занаетчијата е должен во рок од 8 дена од денот на настанувањето на случаите за привремено запирање да го пријави привременото запирање на вршење на дејност на комората.

Комората кај која е извршен уписот во Регистарот на занаетчии, на барање на занаетчијата издава решение за привремено запирање на дејноста, од кое еден примерок се доставува до органот на управата надлежен за јавни приходи.

Занаетчијата е должен, доколку занаетчиската дејност ја врши во простории, на видно место да го истакне периодот на привременото запирање на вршење на дејност.

Ако занаетчијата отпочне со вршење на дејност пред определеното време утврдено со решението за привремено запирање, должен е да го пријави продолжувањето на вршењето на дејноста на комората во рок од три дена од престанокот на причината поради која настанало привременото запирање на вршењето на дејноста.

Комората во рок од три дена од денот на добивањето на пријавата, го известува органот на управата надлежен за јавни приходи, за продолжување на вршењето на дејноста.

Потребни документи

• Барање за привремено запирање на занаетчиска дејнос;
• Решение издадено од Занаетчиска Комора Скопје (оригинал);
• Изјава заверена на нотар;
• Уплата во износ од 3.500,00 денари и
• Уплата во износ од 4.800,00 денари за коморски придонес за реално одданочени занаетчии или 2.400,00 денари за паушално одданочените занаетчии.