Стратешкиот план на Државната комисија за жалби по јавни набавки претставува годишен документ, преку кој се одразуваат целите и приоритетите на Државната комисија за 2017 година.

Првенствено, Државната комисија за жалби по јавни набавки како прва активност и приоритет го посочува решавањето по жалбите во постапките за доделување на договори за јавни набавки, концесии и јавно приватно партнерство и жалбите на решенија на Советот за јавни набавки во законските рокови, на квалитетен и транспарентен начин.

Како следни активности Комисијата ги посочува: зајакнување, развој и одржување на човечките ресурси на Државната комисија, надградба и континуирано одржување на воспоставената –веб-страница на Државната комисија и  учество во процесот на постојана обука и стручно усовршување на сите инволвирани страни во постапките за доделување договори за јавни набавки (приватниот сектор, јавниот сектор и локалната самоуправа) преку организација на работилници.

Во таа насока, Државната комисија за жалби по јавни набавки посочува и на учество во подобрувањето на правната рамка која го уредува системот за јавни набавки во Република Македонија, потоа развојот, одржувањето и надградувањето на електронската архива во Државната комисија за жалби по јавни набавки, како и воведување електронски систем за управување и водење на  целокупната жалбена постапка пред Државната комисија.

Комисијата најавува и воведување на електронско заведување на жалбите преку електронската архива на Државната комисија и електронска распределба на предмети по случаен избор.

„Електронската распределба на предмети во Државната комисија за жалби по јавни набавки се врши и ќе се врши по случаен избор, исклучиво по електронски пат. Со воведувањето на електронската архива и електронската распределба за работа на предметите се постигна уште побрза и поефикасна распределба и решавање на предметите, што всушност е и најголема придобивка за сите заинтересирани лица во постапките кои се водат пред Државната комисија за жалби по јавни набавки“, истакнуваат од Комисијата.

Исто така, како активност и приоритет Државната комисија за жалби по јавни набавки го најавува и електронското доставување одлуки на Државната комисија до странките во постапката за правна заштита, како и интегриран систем за поврзување на сите инволвирани страни во жалбената постапка пред Државната комисија по електронски пат во реално време.

Потребно е и, велат од Комисијата, надградба и усовршување на електронската архива, со цел таа да дава посодржајни извештаи кои ќе произлезат од податоците кои се внесуваат во неа.

„Со надградба и усовршување на електронската архива, ќе се придонесе автоматски да се добиваат посодржајни, поцелисходни и поквалитетни извештаи. Системот на електронската архива е потребно да биде подобрен и надграден во делот на обработка на податоците кои се внесени, односно врз основа на податоците кои се внесуваат, тој е потребно автоматски да дава готови обработени податоци во смисла на конкретен број на поднесени жалби, тужби и слични податоци“, образложува во Стратешкиот план за 2017 година, Државната комисија за жалби по јавни набавки за 2017 година.

М.В