Студентите од Правниот факултет при УГД учествуваа на седмиот регионален натпревар за познавање на постапката пред Европскиот суд за човекови права и на Европската конвенција за човекови права.

„Во тимот на апликантите се натпреваруваа Ана Здравева, Аљоша Кацаров и Филип Кулаков, со Иван Ангеловиќ како резерва. Во тимот на респондентите застапници на државата беа Кристијан Панев, Елена Тасева и Ивана Стојанова, со Дејан Михајлов како резерва“, известуваат од Правниот факултет при УГД.

Ментори на студентите беа доц. д-р Дејан Маролов и ас. д-р Елена Максимова. На натпреварот учествуваа осум правни факултети од три држави во регионот.

Студентите одлично го претставија Универзитетот „Гоце Делчев“ и имаа одлични излагања. На крајот на натпреварот го освоија петтото место во многу силна конкуренција на регионални универзитети. УГД веќе традиционално учествува на овие натпревари на кои судии се експерти и судии од Европскиот суд за човекови права во Стразбур.

М.В