Инфо за предметот
Надлежен суд: Основен суд Скопје 1
Бр. на предмет: КОК. Бр. 127/15
СУДЕЊЕ
Почеток: 9 февруари 2016г.
Судија: Верка Петковска (претседавач)
Обвинител: Наум Пановски и Вилма Русковска
„Дива Населба“
На 9 февруари во Основниот суд Скопје 1 започна судскиот процес против 29 лица дел од таканаречената Кумановска група кои се обвинети за тероризам и терористичка организација за настаните поврзани со случувањата од 9 и 10 мај во Дива Населба во Куманово.
По неколкумесечната истрага Основното јавно обвинителство за гонење на организиран криминал и корупција во ноември минатата година поднесе обвинение против 29 лица.
Обвинетите се товарат за сторени кривични дела „Терористичка организација” од член 394 – а и „Тероризам” од член 394 -б од Кривичниот законик.
Кривичниот суд во декември одржа јавна седница за оценка на обвинителниот акт на која обвинителството и одбраната ги изнесоа своите аргументи во однос на обвинението.
Јавниот обвинител од Обвинителството за организиран криминал, Наум Пановски, презентирајќи го обвинението наведе дека по нападот на караулата Гошинце од 21 април 2015 година полицијата започнала обемна истрага и претреси кои се однесувале на лицата за кои постоело основано сомнение дека учествувале во нападот.
„На 9 мај припадниците на Единицата за специјални задачи постапувале по судска наредба за вршење на претрес во врска со сомнение за кривично дело тероризам, а во врска со нападот на караулата Гошинце. Приближувајќи се кон објектот, врз Единицата за специјални задачи била фрлена рачна бомба, при што биле поврдени дел од пoлицајците. Потоа групата продолжила да пука со автоматско оружје и снајпери, а борбите траеле цела вечер и другиот ден. Следниот ден вечерта групата била приведена, притоа 18 од нив носеле униформи на УЧК“, наведе застапникот на обвинението.
Од ваквиот краток приказ на доказите произлегува дека обвинетите се сторители на кривичните дела и предлагаме Судот да го прифати обвинението, истакна Пановски на јавната седница.
Сите 29 обвинети за кумановските случувања, пак, рекоа дека не се чувствуваат виновни. Според одбраната, која не негира дека имало вооружена група, предметот треба да се предаде на специјалната обвинителка, бидејќи мотивот, како што велат, не е тероризам, а обвинетите се жртви на друго сценарио.
Во дводневната престрелка во кумановската Дива Населба загинаа осум припадници на македонската полиција и десет припадници на вооружената група. Според официјалните информации, меѓу загинатите се и Бег Ризај и Мирсад Ндрецај, кои исто така наводно биле едни од водачите на групата.
Тек на постапката
- 29.7.2016 – Судењето за предметот „Дива населба“ ќе продолжи во септември зад затворени врати
- 14.7.2016 – Обвинети во „Дива Населба“ барале одложување на рочиштето поради повреди
- 14.6.2016 – СУДЕЊЕ „ДИВА НАСЕЛБА“: Процесот продолжува со читање на исказите на сведоците
- 6.6.2016 – ОБВИНЕТИ ВО „ДИВА НАСЕЛБА“: Шест дена бевме во Кумановско, но не предизвикавме никаква несигурност кај граѓаните
- 31.5.2016 – СЛУЧАЈ „ДИВА НАСЕЛБА“: Забранет влез во Врховниот суд за адвокатите и за новинарите. Судењето одложено
- 20.5.2016 – Со Одлука на Владата, големата сала на Врховниот суд привремено отстапена за судењето „Дива Населба“
- 19.5.2016 – СЛУЧАЈ „ДИВА НАСЕЛБА“: Кривичниот суд сѐ уште не добил просторија за одржување на судењето
- 11.5.2016 – Судот направи спојување на постапките за случаите „Дива Населба“ и „Молња“. Единствениот процес ќе почне од почеток
- 22.3.2016 – Со сослушување на заштитени сведоци продолжува судењето за случајот „Дива Населба“
- 08.3.2016 – Командирот на еден од обвинетите кој бил полицаец и локално население од Кумановско сведочеа на денешното рочиште за „Дива Населба“
- 02. 3.2016 – (ОБНОВЕНО) Тројца адвокати во случајот „Дива населба“ казнети по 1 200 евра, двајца од нив треба да ги покријат и трошоците за денешната постапка
- 25. 2.2016 – СУДЕЊЕ „ДИВА НАСЕЛБА“: Жената и ќерката на еден од обвинетите со контрадикторни сведочења
- 23.2.2016 – СУДЕЊЕ „ДИВА НАСЕЛБА“: Полицајците нападнати во Гошинце сведочеле пред судот
- 01.2.2016 – СЛУЧАЈ „ДИВА НАСЕЛБА“: Судењето за тероризам започнува на 9 февруари
- 17.12.2015 – ОДОБРЕНО ОБВИНЕНИЕТО ЗА ДИВА НАСЕЛБА: Приговорите на обвинетите одбиени како неосновани
- 07.12.2015 – Обвинетите од Дива населба не се чувствуваат виновни — одбраната тврди дека мотивот не е тероризам
- 04.11.2015 – Поднесено обвинение против 29 лица за случувањата во кумановската Дива Населба