/ Прочитано:

1.908

Улогата на современата жена во безбедноста на сообраќајот

Сообраќајната култура, етика, навиките на однесување во сообраќајот се учат од најмали нозе, а тука улогата на жената-мајката отсекогаш била и ќе остане  неприкосновена. Носител на позитивните промени во сообраќајот, во градењето на сообраќајната култура може и треба да биде жената, истакнуваат од Републичкиот совет за безбедност на сообраќајот на патиштата.

Бројот на жртви од сообраќајни незгоди во светот е на ниво на пандемија, покажуваат голем број анализи, во кои е нагласено дека доколку овој број се спореди со бројот на починати од животозагрозувачки болести, тој е на ниво на пандемијата на сида, туберкулоза и маларија.

Земајќи го предвид овој факт, Светската здравствена организација и Обединетите нации ја започнаа Декадата на акција за безбедност на патиштата, чија цел е да се  стабилизира, а потоа и да се намали бројот на жртвите во сообраќајот на глобално ниво, т.е. да се преполови бројот на жртви од сообраќајните незгоди до 2020 година.

На светско ниво, 1,3 милиони луѓе умираат секоја година на патиштата како последица на сообраќајни незгоди, на секои 30 секунди по еден човек го губи животот во сообраќајна незгода или тоа е повеќе од 3000 луѓе на ден, а  50 милиони луѓе во светот се повредени во сообраќајни незгоди на годишно ниво, додека голем дел од нив остануваат со трајни последици. На светско ниво, повредите од сообраќајни  незгоди се причина број 1 за смрт на младите луѓе на возраст од 15 до 29 години, а  500 деца ги губат своите животи секој ден на патиштата низ светот.

„Улогата на современата жена во сообраќајот е значајна и таа не се ограничува само на придонесот на жените како активни учесници во сообраќајот, туку е многу позначајна ако се земе предвид дека жената, пред сѐ, била и ќе биде мајка, родител, воспитувач, едукатор. Сообраќајната култура, етика, навиките на однесување во сообраќајот се учат од најмали нозе, а тука улогата на жената-мајката отсекогаш била и ќе остане  неприкосновена. Носител на позитивните промени во сообраќајот, во градењето на сообраќајната култура може и треба да биде жената и тоа беше и главниот мотив  РСБСП и АМСМ да организираат трибина посветена на жените, нивната улога во сообраќајот и проблемите и предизвиците со кои се соочуваат жените како учесници во сообраќајот“, нагласуваат од Републичкиот совет за безбедност на сообраќајот на патиштата.

На трибината на тема: „Временските услови како фактор за безбедност во сообраќајот“, организирана по повод Меѓународниот ден на жената – 8 Март,учествуваа: државниот секретар во МВР Сања Димитриевска, претседателот на РСБСП Стојче Стаменковски, стратегискиот менаџер од АМСМ Ирена Миновска и голем број истакнати професори, гости и експерти.

„Ние во Републичкиот совет за безбедност на сообраќајот на патиштата  поделбата на учесниците во сообраќајот на машки и женски ја правиме за одредени наменски потреби, но во нашето дејствување, РСБСП е еднакво посветен на сите групи учесници во сообраќајот. За нас има само добри и лоши, совесни и несовесни возачи. Процесот на промена на навиките и културата на однесување во сообраќајот е бавен и тежок, но нашата мисија е благородна и значи спасување човечки животи и затоа нема да застанеме, не се откажуваме. Вашата поддршка за намалување на бројот на настрадани лица во сообраќајни незгоди навистина многу ни значи“, истакна претседателот на РСБСП, м-р Стојче Стаменковски на трибината, обраќајќи се пред голем број припаднички од понежниот пол.

Сања Димитриевска, државен секретар во Министерството за внатрешни работи, нагласи дека голем број истражувања, анализи, а пред сѐ, реалноста покажуваат дека жените возачи се многу внимателни при возење, одговорни се и се придржуваат кон сообраќајните правила и прописи. 

„Брзото и агресивно однесување во сообраќајот не е својствено за жените. Ретко може да се види жена да ги потценува последиците од  управување на моторно возило под дејство на алкохол, да пристигнува непрописно итн. Статистиката покажува дека жените помалку предизвикуваат сообраќајни незгоди со фатални последици и дека помалку страдаат во сообраќајни незгоди. Во изминатата  2016 година, во Република Македонија  од 165 загинати лица во сообраќајни незгоди, 29 се припадници на понежниот пол“, рече Димитриевска и ги повика присутните преку својот личен пример и личен  придонес  да го направат првиот чекор кон издигнување на сообраќајната култура и етика на уште повисоко ниво. 

Сообраќајните незгоди може да бидат спречени и затоа АМСМ, како членка на ФИА, заедно со надлежните организации во Македонија, активно учествува во организација на кампањи за подигање на сообраќајната култура во Македонија, сѐ со цел да се намали бројот на жртви на патиштата.

Темата на оваа трибина, како што нагласија организаторите, беше инспирирана од искуствата во последните неколку години кога временските услови направија огромна материјална штета, а однесоа и човечки жртви.

„Земајќи предвид дека жената е претежно таа што се грижи за семејството, а и е сѐ посамостојна, сметавме дека оваа година треба да обрнеме внимание на подигнување на сообраќајната култура на жените учесници во сообраќајот во екстремни временски услови“, потенцираше Ирена Миновска, стратегиски менаџер од АМСМ.

А. Б.