/ Прочитано:

1.151

Успех на студентите од Правниот факултет при УГД на натпревар за постапката пред ЕСЧП

Второ место за тимот на Правниот факултет при УГД на регионалниот натпревар за познавање на постапката и праксата на ЕСЧП и ЕКЧП.

„Во неделата на 27 септември завршија двата финални меча на PreMoot натпреварот во Ниш, за познавање на праксата на Европскиот суд за човекови права и Европската конвенција за човекови права, организиран од страна на Правниот факултет во Ниш и клубот Јустиција.

Нашите натпреварувачи, по четири победи во низа, во саботата се пласираа во финалето токму со клубот Јустиција, кој важи и за европски победник во вакви натпреварувања. Во саботните мечеви извојуваа победа над клубовите на правните факултети од Крагуевац, Ниш и Лукавица (БиХ).

По долги неколкучасовни мечеви, победа извојуваа клубот Јустиција, со само по еден поен разлика во меч, со што нашиот тим го зеде второто место на овој натпревар, кој е од регионален карактер.

Нашите натпреварувачи: Елена Паризова, Благој Милев, Елена Трајковска, Ангела Димеска, Вероника Газепова и Јована Михаилова покажаа одлични познавања на материјата, подготвеност за тимска игра и умешност во одговарање на прашањата, за што и беа пофалени од еминентни практичари и теоретичари од Р Србија во улога на судии.

Особено сме горди на тимот. Препознаваме во нив жестоки практичари, на кои им претстои блескава кариера во областа. Посебна благодарност до Вероника Газепова и Елена Трајковска, кои ја презедоа улогата на помошни тренери.

Нашите честитки ги упатуваме и до организаторите, кои и во услови на пандемија овозможија реализација на натпреварот и хибриден модел на учество (онлајн и со физичко присуство) на сите тимови од Македонија, Србија и Босна и Херцеговина. Техниката и далечината не ги спречија за натпреварот да доживее беспрекорна реализација.

Во улога на горди академски тренери на нашиот тим и на клубот A fortiori од  Правниот факултет се проф. д-р Дејан Маролов, доцент д-р Елена Максимова и асс. м-р Наташа Донева“, информираат од Правниот факултет при УГД.

М.В