/ Прочитано:

1.713

Утврдени недостатоци при надзори од Државниот управен инспекторат во поглед на управното и канцелариското работење

Инспекторите на Државниот управен инспекторат во 2016 година извршиле вкупно 3.567 инспекциски надзори, од кои 1.801 се редовни инспекциски надзори, 594 контролни инспекциски надзори од кои 448 по извршен редовен инспекциски надзор и 146 по извршен вонреден инспекциски надзор, како и 1.172 вонредни инспекциски надзори. Просечен број на надзори по инспектор се 112, се вели во годишниот извештај на Државниот управен инспекторат.

Согласно материјалните прописи за работењето на Државниот управен инспекторат, надзорите се дефинираат како надзори за спроведување на актите за управното и канцелариското работење, Законот за вработените во јавен сектор, Законот за административните службеници.

„Редовните надзори се вршени во поглед на примена на одредбите за управно и канцелариско работење, како и Законот за вработените во јавен сектор. Контролните инспекциски надзори се вршени по извршените редовни надзори од управното и канцелариското работење, како и по материјалните прописи за поведените иницијативи. Вонредните надзори, како и контролните по вонредните најчесто се по управното и канцелариското, а помал дел и по Законот за вработените во јавен сектор и Законот за административните службеници“, посочуваат од Државниот управен инспекторат.

Од вкупно извршени 3.567 надзори во 2016 година, најголем дел се извршени во поглед на управното и канцелариското работење и материјалните прописи на субјектите вкупно 2.746, за примена на одредбите од Законот за државните службеници се извршени 37 надзори, во однос на примената на Законот за јавни службеници се извршени 41 надзор, Закон за вработените во јавниот сектор се извршени 737 надзори, а во однос на примена на Законот за административни службеници се извршени  6 надзори.

Утврдени недостатоци во поглед на примена на прописите за управно работење

Во поглед на управното работење, образложуваат од Државниот управен инспекторат, при инспекциските надзори во органите на државната управа и другите установи и институции, правни и други лица на кои со закон им е доверено вршење јавни овластувања, органите на општините, Градот Скопје и општините во Градот Скопје, органите кои одлучуваат по жалба и други органи, Државниот управен инспекторат утврди недостатоци:

–     Управните акти да се усогласат во целост со ЗОУП;

–     За донесените управни и инспекциски акти да се прибавува доказ за уредна достава;

–     По барања за издадени дупликати свидетелства да се донесуваат решенија;

–     Во предметите каде што не се исполнети условите според материјалните прописи и/или ЗОУП да се донесуваат заклучоци за прекин на постапката;

–     По истекот на рокот зададен со заклучок за прекин, да се постапува по предметите без разлика дали странката постапила по заклучокот;

–     Жалбите по првостепените акти уредно и навремено да се доставуваат до второстепениот орган;

–     Да се постапува по второстепени решенија и да се носат нови првостепени решенија;

–     По предмети во првостепена управна постапка да се води уписник УП1;

–     Да се врши административно извршување на решенијата и заклучоците на градежниот инспектор;

–     На раководното лице кое одлучува, да му се даде овластување за одлучување во управна постапка;

–     Правната поука во актот за одобрение за сеча да се усогласи со ЗОУП и Законот за шуми

–     Нерешените предмети кои се комплетирани, а истекол рокот за решавање да се решат;

–     За предметите од второстепена управна постапка да се води уписник УП2;

–     Управните и реалните акти да се донесуваат и издаваат во согласност до ЗОУП;

–     Предметите од инспекциската постапка да се евидентираат во уписник ИП1;

–     Да се овласти лице/член да одлучува во постапката по жалби согласно материјалните прописи на Државната комисија за одлучување во управна постапка и постапка од работен однос во втор степен;

–     Директорот на државен инспекторат е должен да изготвува годишна програма за работа на инспекторатот, квартални планови за секој инспектор и истите да ги доставува до Инспекциски совет во согласност со Законот за инспекциски надзор и други.

Утврдени недостатоци при примена на прописите за канцелариско работење

Во поглед на канцелариското работење при инспекциските надзори во органите на државната управа и другите установи и институции, правни и други лица на кои со закон им е доверено вршење јавни овластувања, органите на општините, Градот Скопје и општините во Градот Скопје, органите кои одлучуваат по жалба и др,, Државниот управен инспекторат утврди недостатоци:

–     За бројот и видот на деловодници и уписници кои ќе ги води органот, функционерот кој раководи да донесе управен акт;

–     За водење на деловодник и/или уписник да се овласти службено лице;

–     Да му се даде овластување на службено лице за отворање, прегледување и распоредување на поштата;

–     Да се води евиденција за печатите и штембилите;

–     Да се даде овластување на лицето/а кое ракува со печатите и штембилите;

–     Уредно и целосно да се пополнуваат рубриките во деловодникот;

–     На примените документи да се става отпечаток од роковниот штембил;

–     Да се води книга за пошта и уредно да се пополнува;

–     Да се води интерна доставна книга и уредно да се пополнува;

–     Секој предмет да се става во кошулка и истата уредно да се пополнува;

–     Решените предмети да се враќаат во архивата за разведување;

–     Да се изготвува План за архивски знаци со Листи и за истиот да се прибавува согласност од Државниот архив на РМ.

М.В