По поднесено барање за вонреден инспекциски надзор од страна на Хелсиншкиот комитет, Државниот инспекторат за труд – ПЕ Ресен утврди недостатоци и неправилности во работењето на текстилната фабрика во Ресен, а во поглед на неплатена прекувремена работа.

„Во донесеното решение по извршениот инспекциски надзор, Државниот инспекторат за труд – ПЕ Ресен утврдил дека во споменатата фабрика се врши прекувремена работа во сабота, прекувремената работа се евидентира, но не се исплаќа согласно со закон. Инспекторатот со решение го задолжил работодавачот во рок од 30 дена од доставата на решението да им ја исплати прекувремената работа на 170 вработени во фабриката. Ова е прва постапка за вонреден инспекциски надзор, иницирана од страна на Хелсиншкиот комитет, во која се утврдени неправилности во смисла на неплатена прекувремена работа во текстилната индустрија. Ја поздравуваме ваквата одлука на Државниот инспекторат за труд и ги охрабруваме текстилните работнички и работници да продолжат да пријавуваат неплаќање на прекувремената работа“, информираат од Хелсиншкиот комитет.

М.В