Земјоделците веќе нема да бидат обврзани да ги намират обврските кон УЈП за да добијат субвенции, се предвидува во новите предложени измени на Законот за земјоделство и рурален развој. Во таа насока, со предложените законски измени се предлага за корисниците на средствата во согласност со Законот за земјоделство и рурален развој да престанат да важат условите за намирени обврски по други основи кои не се во областа на земјоделството, односно обврски за кои е надлежна Управата за јавни приходи.

Истовремено, со Законот се предлага во иднина за корисниците на средствата во согласност со Законот за земјоделство и рурален развој да престане да важи и условот за намирени обврски врз основа на обврски по склучени договори за користење на средства од компензациони фондови од странска помош за кои е надлежно Министерството.

Понатаму, со законските измени се предлага и воведување на нова помош за земјоделските стопанства која треба да овозможи намалување на трошоците за земјоделското производство и поконкурентно земјоделско производство.

Во таа насока, се предлага кофинансирање на трошоците за набавка на гориво за земјоделското производство до 50 %, со што значително ќе се влијае на намалувањето на трошоците на земјоделските стопанства за земјоделското производство.

Со законските измени е опфатена и „зелената нафта“ или, како што се наведува, поддршката на трошоците за набавка на гориво за земјоделска механизација. Предвидено е поддршката да изнесува до 50 отсто од трошоците на земјоделските стопанства за набавка на гориво, а ќе се доделува со давање платежни картички за набавка на гориво во определен износ.

Целта на измените е да се овозможи ефикасна и навремена исплата на средствата од програмите за финансиска поддршка во земјоделството и руралниот развој на крајните корисници, намалување на трошоците за земјоделското производство и поконкурентно земјоделско производство.

М.В