16 јануари, 2013 15:49

Зградата на АД „Македонска пошта“ не била осигурана

Среда, 16 јануари 2013 – Причините кои го предизвикаа пожарот што вчера ја зафати зградата на АД „Македонска пошта“ се уште не се познати, останува непозната и сумата на пари која вчера изгорела или пак била оштетена при гаснење на пожарот. Она што директорот на претпријатието, Рафиз Алити го обелодени на денешната прес конференција е дека зградата не била осигурана од штета, сепак тој уверува дека тендерот за избор на осигурителна компанија е во тек, а победникот ќе имал обврски да ја плати штетата. 
„Штетите од вчерашниот пожар во главната зграда на АД „Македонска пошта“ – Скопје се минимални бидејќи не е оштетена сервер салата ниту архивата. Оштетени се покривот, шалтер салата и некои канцеларии од вториот кат. Првиот кат не е оштетен“, истакна на денешната прес-конференција  директорот Рафиз Алити, додавајќи дека функционираат нормално и очекуваат денеска да се поврзе опремата за да функционира уплатата и исплатата, а пратките се сигурни.

Алити објасни дека пожарот почнал на вториот кат, а дека се претпоставува дека бил спој на електричните жици. Не знаеше да ја потврди висината на штетата.

„Засега не можеме да ја кажеме висината на штетата во пожарот. Управниот одбор на АД „Македонска пошта“ – Скопје и денеска ќе се состане. Уште утре ќе се формира Комисија која ќе ги направи проценките за висината на штетата. Денеска истражните органи се во зградата и ги утврдуваат причините за пожарот“, посочи Алити.

Објасни дека имале отворен тендер за осигурителна компанија, кој уште не е затворен,  а во кој има клаузула според која секој кој ќе го добие тендерот ќе го надомести осигурувањето на зградата, кое важи од 1 јануари годинава.

„Тој што ќе го добие тендерот треба да ја покрие штетата. На тендерот имавме четири-пет компании кои се заинтересирани“, потенцираше Алити.

Нагласи дека во шалтер салата имало и пари во железните каси, кои се уште не се отворени бидејќи трае истражната постапка.

Фото: Курир