/ Прочитано:

793

Жерновски: Сите започнати објекти ќе се довршат

Сабота, 8 јуни 2013 – Протестот пред Oпштината Центар заврши доцна синоќа, седницата на Советот за ставање вон сила четири детални урбанистички планови е одложена. Обидот да се оддржи седница во оваа скопска Општина беше спречен од група демонстранти кои дојдоа да спречат наводно уривање на црквата Св. Константин и Елена.

Градоначалникот на  Општина Центар, Андреј Жерновски изјави дека сите објекти кои се во изградба меѓу кои и црквата Св.Константин и Елена ќе продолжат да се градат, односно дека со ста­ва­ње­то на плановите вон сила, не може да се стопира каква било градба за која веќе е из­да­де­но решение за градба. 

„Немам намера да ја уривам црквата Св. Константин и Елена во центарот на Скопје, вели Жерновски за телевизијата „24 вести“ уверувајќи дека и ако се врати деталниот урбанистички план, сите започнати објекти ќе се довршат. Како што Жерновски посочува, нема да се дозволи единствено да се градат нови објекти како дел од проектот „Скопје 2014“ без одобрување од граѓаните.

Според него, луѓето кои што вчера протестираа пред Општината се изманипулирани од владеачката партија ВМРО-ДПМНЕ.

Демонстрантите неколку пати ја прекинаа седницата на Советот при што скршија десетина прозорци и се обидоа насилно да влезат во општината.

Од МВР соопштија дека тие немаат право да го спречат правото на протест на граѓаните.