Адвокатите дадоа свечена заклетва дека должноста ќе ја извршуваат совесно и дека ќе се придржуваат на Уставот, законите, меѓународните договори ратификувани во согласност со Уставот, Статутот на Комората, Кодексот на адвокатската етика и дека во сите свои постапки ќе внимаваат на угледот на адвокатурата како јавна служба.

„Бидете горди претставници на македонската адвокатура! Во судница настапувајте секогаш со исправена глава и немојте да дозволите никој да ви наредува како да се однесувате. Интересот на клиентите нека ви биде примарен и тој нека ве води во вашата кариера – не само пред судовите и други институции туку и пред вашите колеги. За да бидете добри адвокати, секогаш треба да бидете подготвени, дури и поподготвени од судијата кој ја води постапката….“

„…Тоа е единствениот начин да знаете дека совеста ви е мирна и дека сте го исполниле успехот во вашето застапување. Тоа што посебно сакам да ви го нагласам е – имајте почит кон Адвокатската комора, имајте почит кон организацијата што ги доделува, но и ги одзема лиценците во случај да не ја почитувате и да се однесувате недолично“, им порача на новите адвокати претседателот на Адвокатската комора на РМ (АКРМ), Никола Додевски.

Додевски  истакна дека и во судницата и надвор од судницата адвокатот мора да биде достоинствен и во клиентот единствено да гледа човек кому му е потребна стручна и професионална адвокатска услуга.

„Никогаш немојте да се служите со недозволени средства, никогаш во судницата и надвор од неа немојте да се служите со ништо што не е дозволено со законите, а особено со адвокатската етика, која сите вие имавте можност да видите колку ја познавате и која во практиката ќе мора да ја применувате многу постриктно. Секогаш штитете ги достоинството и угледот на адвокатурата“, истакна претседателот Додевски, посакувајќи на новите адвокати многу успех во работата.

М.В