Четврток, 6 ноември 2014 – Специјализантите пред камера ќе треба да полагаат пред камера, а снимките од нивните специјалистички испити ќе се емитуваат на веб страната на Министерството за здравство. Ова се дел од новите предложени измени во Законот за здравствена заштита.

Специјализантите ќе имаат и задолжителни активности како дневната посета и ќе бидат обврзани да извршат минимален број на интервенции во зависност од специјалноста, вели министерот Никола Тодоров.

„За да не може да има било какви интервенции и за да не може да има врски, народски да ви кажам, да не може да му се помогне на оној или овој, без разлика дали е тој близок на некој професор, близок на министер, на политичар, на било кој. За сите да имаат еднаква позиција во системот“ – вака министерот ги објаснува причините за ваквите законски измени.

Измените, кои ги изготви Министерството, предвидуваат казни и до 20 % од основните плати на директорите на јавните здравствени установи доколку не даваат отчет за клучните индикатори во работата на лекарите но и разрешување доколку овие грешки се повторат три пати во текот на годината.