Групацијата за домување со станбен и деловен простор, на состанокот одржан во Стопанската комора на Македонија, заклучи дека ќе поднесе иницијатива за измена на Законот за техничка инспекција за да се дефинира чија е одговорноста во случај кога се користат технички неисправни лифтови во станбените згради, за кои има извештај дека се технички неисправни. Од Групацијата за Академик велат дека ова прашање предизвикува многу проблеми низ практиката и дека им штети  ним, како субјекти, но и на граѓаните.

Иницијатива за измени на Законот за техничка инспекција

Во врска со иницијативата за измените на Законот за техничка инспекција, од Стопанската комора и од  Групацијата за домување со станбен и деловен простор посочуваат дека ваквата одлука доаѓа по неколку состаноци што ги имаат одржано самостојно, како и по средбите реализирани со Регулаторната комисија за домување, со претставниците на Техничката инспекција, со инспекторите надлежни за дејноста и со други државни институции вклучени во оваа област.

Лиценцираните управители за домување го отвораат на разгледување проблемот со одговорноста за лифтовите бидејќи тие како управители на влезовите, во согласност со Законот за домување, само ги вршат обврските во името на станарите, но сопственоста на заедничките простории во влезот, вклучувајќи ги и лифтовите, е на станарите.

„Врз таа основа, управителите немаат право во името на станарите да го исклучуваат лифтот“, посочуваат од Групацијата.

Ваквата констатација произлегува и од Регулаторната комисија за домување којашто, по состанокот реализиран со Групацијата за домување со станбен и деловен простор при Стопанската комора на Македонија, со писмен допис го известила Техничкиот инспекторат дека, во согласност со Законот, лиценцираните управители не подлежат на одговорност.

„На состанокот беа потенцирани и уште неколку други проблеми со кои се соочуваат лиценцираните управители во текот на своето работење, како што се користење и заштита на средствата од резервниот фонд, дорегулирање на Законот за   домување како матичен закон итн. Присутните на состанокот беа информирани и за можноста за остварување соработка со Кредитното биро на Македонија, во насока на поттикнување на свеста на физичките лица и правните субјекти да си ги плаќаат редовно своите обврски“, велат од Стопанската Комора.

„Дури 90 проценти од лифтовите имаат детектирана неисправност“

Членките на Групацијата  за домување со станбен и деловен простор коментираат дека е регулирањето на сопственоста на лифтот суштинското барање за измената на Законот за техничка инспекција, што, пак, понатаму предизвикува правни импликации низ практиката. Според нив, доколку се направи технички преглед на лифтовите, на дури 90 проценти од нив ќе биде детектирана неисправност којашто е, како што истакнуваат, наследена како проблем.

Од тие причини и управителите бараат посебни кредитни линии и помош од општините за заменување или за техничка исправка на лифтовите.

„Ако се интервенира со финансиска помош за фасадите, зошто тогаш и внатрешноста на зградите, односно лифтовите во зградите да не бидат санирани и заменети врз таа основа“, коментираат управители од Групацијата за домување со станбен и деловен простор.

Во чија сопственост се лифтовите во зградите?

Од Државниот инспекторат за техничка инспекција велат дека се разговарало со претставниците околу ова прашање. Претставниците од Инспекторатот, кои  се запознати со реалната состојба, истакнуваат дека на овие средби укажале дека ако се јавува конфузија околу толкувањето и примената на Законот, тогаш е потребно Групацијата да предложи законски измени.

„Но во ваква ситуација ние мораме да ги спроведуваме законите. Ако не, тогаш прецизно нека се внесе во прописите дека сопственоста не е на тие фирми, односно на управителите на зградите“, велат претставниците од Инспекторатот, додавајќи дека и тие посочиле предлози за аплицирање на одредени фондови, за да се заменат оние лифтови за кои е неопходно да се заменат, што чини многу, но во таа насока дополнуваат дека има и такви што треба да се санираат и да се поправат, за коешто одговорноста ја лоцираат кај управителите на станбените згради.

Од Регулаторната комисија за домување потенцираат дека, според нив, во согласност со препораките што ги дале до Инспекторатот, сопственоста на лифтовите не е на станбените управители, туку на корисниците на посебните делови.

„Станбените управители се должни да менаџираат и да ги спроведуваат обврските во согласност во Законот за домување“, велат од Регулаторната комисија за домување.

„Сопственици сме само кога треба да нè казнат“

Практиката говори дека додека трае оваа правна дилема околу сопственоста на лифтовите, управителите на зградите се соочуваат со казни.

„Се наоѓаме во една крајно конфузна и недефинирана состојба. Од една страна, како што е и препораката на Регулаторната комисија и на Законот за домување, ние не сме сопственици на лифтовите и фактички немаме ни правна основа ни многу простор да дејствуваме тука, а посебно немаме обврска да купуваме нови лифтови. Од друга страна, пак, се соочуваме со казни бидејќи лифтовите не биле технички неисправни, а факт е дека многу лифтови треба да се заменат, што е должност на сопствениците. Затоа и апелираме за дополнителна помош за набавка на лифтови за да им се помогне на сопствениците и за да бидат безбедни. Нема никаква логика да бидеме сопственици само кога треба да нè казнат, а не претходно “, коментираат лиценцираните управители за домување.

И одговорноста на сервисерите на лифтовите да биде законски регулирана

Управителите сметаат дека е од суштинско значење вклучувањето на сервисерите на лифтовите во целата приказна. Секоја зграда има склучено договор со компанија за месечен сервис на лифтот. Тие луѓе, како стручни и обучени за таа дејност, треба да преземат одговорност која секако би била законски регулирана во врска со безбедноста и функционирањето на лифтот за кој плаќаат станарите.

12.12.2014

М.В/veljanoskim@akademik.mk