(Користење на итна медицинска помош во земји со кои РМ нема склучено договор за социјално осигурување или кога договорот не бил испочитуван)

Осигуреното лице кое привремено престојува во странство (на приватно или службено патување, студиски престој, школување и стручно усовршување, престој во врска со меѓународна техничка, научна и културна соработка и сл.) може да користи само итна медицинска помош.

Како итна медицинска помош се смета користење на здравствени услуги неопходни за отстранување на непосредната опасност по животот и здравјето на осигуреното лице додека трае опасноста.

Итноста на случајот, времетраењето на итноста и здравствените услуги потребни за отстранување на непосредната опасност по животот и здравјето на осигуреното лице ги оценува лекарска комисија на Фондот за здравствено осигурување на Македонија врз основа на медицинската документација од странската здравствена установа.

Осигуреното лице кое користи здравствена заштита во итен случај е должно по завршувањето на итноста да се врати во земјата за да го продолжи лекувањето. Ако по завршувањето на итноста осигуреното лице не се врати навреме во земјата и ако го продолжи лекувањето во странство, за тој период трошоците паѓаат на негов товар.

Надомест на трошоците за извршени здравствени услуги во итни случаи за време на привремен престој во странство осигуреното лице остварува врз основа на барање на Образец Л3.

Кон барањето се приложуваат и следните документи:

– мислење од лекарската комисија на Фондот за итноста на случајот и за времетраењето на итноста;
– медицинска документација за извршените здравствени услуги во странство, преведена од овластен преведувач;
– сметки (фактури) за платени здравствени услуги со фискална сметка преведени од овластен преведувач;
– потврда за платен придонес за задолжително здравствено осигурување и
– здравствена легитимација на увид.

Здравствените услуги Фондот ги признава во полн износ, намалени за пропишаното учество за лекување во странство.