Обвинение за вработен во МВР за сторено кривично дело „Незаконито влијание врз сведоци“ денеска поднело Обвинителството за гонење на организиран криминал и корупција.

„По поднесена кривична пријава од Министерството за внатрешни работи против едно лице вработено во МВР Основното јавно обвинителство за гонење на организиран криминал и корупција ги презеде сите потребни дејствија за утврдување на фактите во предметот. Притоа е утврдено дека постои основано сомнение дека осомничениот го сторил кривичното дело што му се става на товар, односно дека со нудење поткуп влијаел на едно лице, а со цел лицето да се појави како сведок во постапка пред суд и да даде исказ во определена насока“, се наведува во соопштението на Обвинителството.

Обвинението е доставено до Основниот суд Скопје 1.

Кривичната пријава беше поднесена минатата недела и се однесува на вработен во МВР кој вршел влијание врз друго лице во насока тоа да даде одредена изјава пред Специјалното јавно обвинителство.

Покрај оваа кривична пријава, до Основното јавно обвинителство Скопје поднесени се уште шест кривични пријави против вработени во Специјалното јавно обвинителство. Пријавите се поднесени од различни физички лица и се однесуваат за кривично дело „Малтретирање во вршење на службата“ од член 143 од Кривичниот законик.

„Една од кривичните пријави е против три познати лица, обвинители и неколку непознати лица. Три од кривичните пријави се против неколку непознати лица. Две од кривичните пријави се против двајца обвинители и неколку непознати лица“, велат од Обвинителството.