Хашкиот трибунал денес, четири години по завршувањето на судењето на лидерот на Српската радикална странка, Војислав Шешељ, донесе пресуда дека Војислав Шешељ се ослободува од сите точки на обвинението за злосторства против човештвото и кршењето на законите и обичаите на војување.

Судијата Жан Клод Антонети соопшти дека Обвинителството не дало доволно докази и правни аргументи за ниту една од деветте точки на обвинението и ја изрече пресудата со следните зборови: „Војислав Шешељ е слободен човек”.

Тој наведе дека Обвинителството не обезбедило доволно докази за постоење злосторничко здружување, како и дека целта била одбрана на Србија, а не прогон на хрватското население.

Претходно, Обвинителството во своите завршни зборови побарало од Судот да го осуди Шешељ на казна затвор од 28 години, а Шешељ побарал ослободителна пресуда.

Шешељ денеска не беше во Хашкиот трибунал за да ја слушне пресудата.