Судијата Киро Здравев нов претседател на Судскиот совет
Нов претседател на Судскиот совет е судијата Киро Здравев – одлучија денеска едногласно членовите на Судскиот совет. За заменик на Здравев е избран Селим Адеми, кој во 2013 година по предлог на Собранието на Република Македонија беше избран за член на Судскиот совет.
Киро Здравев, кој е судија во Врховниот суд, за член на Судскиот совет е избран во 2018 година.
Киро Здравев дипломирал во 1981 година на Правниот факултет при Универзитетот „Св. Кирил и Методиј“ во Скопје, а правосудниот испит го положил во 1982 година.
Во 1983 година е избран за судија во Општинскиот суд во Штип – Граѓански оддел.
Во 1988 година е избран за претседател на Општинскиот суд Штип – Кривичен оддел.
Во 1996 година е избран за судија во Апелациониот суд Штип – Граѓански оддел.
Во 2004 година е избран за судија во Врховниот суд на Република Македонија, каде што е распореден во Одделот за управни спорови и како дополнителен член во советот за граѓански дела.
Како судија во Врховниот суд на Република Македонија бил претседател на Одделот за граѓански дела и претседател на совет во овој оддел.
Во 1993 година е член на Иницијативниот одбор за основање на Здружението на судиите на Република Македонија.
Од 1994 до 2002 година е член на Управниот одбор на Здружението на судиите.
Со основање на Академијата за судии и јавни обвинители „Павел Шатев“ е ангажиран како едукатор за почетна и континуирана едукација.
Член е на повеќе комисии за измена и дополнување на закони и за изработка на Граѓанскиот законик на Република Македонија.
Во 2001 година со членовите на Одборот на Центарот за едукација бил на студиски престој во Националниот судиски колеџ во Рино (Невада) и во Вашингтон, САД.
Има објавено повеќе трудови.
Преку Академијата за судии и јавни обвинители „Павел Шатев“ ги има поминато обуките за стручно усовршување во областа во која работи.
М.В