Апелациониот суд Скопје ја укина пресудата за затворската казна на дедото на Тамара, Љупчо Стојановски. Жалбата на Стојановски е уважена и предметот е вратен на повторно судење. Новото рочиште ќе се одржи на 3 декември, потврдува адвокатката на Стојановски, Павлина Зефиќ. Дедото на Тамара беше осуден на казна затвор од седум и пол години за обид за убиство на поранешниот министер за здравство, Никола Тодоров.

Најавувајќи жалба, одбраната на Стојановски тврдеше дека нема доволно докази кои укажуваат дека делото е извршено со умисла.

„Имаме недоверба кон институциите бидејќи сметаме дека МВР и Обвинителството не си ја завршиле својата работа. Сите бевте сведоци дека немаше барутни честички на неговите раце и на неговата облека, а немаше и доказ каде завршил проектилот, кој бил пронајден после 16 дена“, истакна во врска со пресудата адвокатката Павлина Зефиќ.

Според Апелациониот суд, пресудата е недоволно јасна и разбирлива. Во образложението не се содржани доволно причини за решителните факти во однос на постоењето на предметното кривично дело и кривичната одговорност на страна на обвинетиот.

Малата Тамара Димовска почина пред повеќе од три години, чекајќи операција на ʹрбетот во странство. За овој случај сега се води судски процес.

М.В