Денес во 12 часот, Собранието на Република Македонија ќе ја продолжи 92-та седница на чиј дневен ред се предлозите за изменување и дополнување на Законот за безбедност на сообраќајот на патиштата, Законот за минимална плата, Законот за политичките партии, Законот за Владата на Република Македонија, Законот за заштита и спасување и Законот за земјоделство и рурален развој.

Покрај овие закони, на дневен ред се и три барања за автентично толкување.

Законот за безбедност на сообраќајот на патиштата предизвика незадоволство и штрајк на автошколите во изминатиот период поради што се предложува условите за основање и за работа на автошколите, во делот што се однесува на видеонадзорот и снимањето со соодветен уред кој овозможува видео и аудиозапис, да започнат да се применуваат по една година од денот на влегување во сила на овој закон.