Ова, се вели во истражувањето, особено важи за урбаниот транспорт. Истиот заклучок е и за секторот енергетика. Во овој сектор одредени проблеми се провлекуваат со години, што може да се огледа во загадувањето, кое речиси целосно се потпира на фосилни горива, увозот е преголем, недоволен е развојот на обновливите извори на енергија и нема доволна поддршка од институциите законски и правно да го потпомогнат развојот на овој сектор.

„Потребно е усогласување на стратешките правци на различните носители на одлуки и воопшто на цела држава за тоа како ќе се развиваат овие два сектора, потребни се сериозна посветеност, човечки ресурси и финансии за да може земјата да фати чекор со остатокот од Европа. Беа презентирани и неколку случаи за кои била или е покрената истрага или постапка пред судовите за коруптивни дејствија“, се вели во истражувањето.

Заклучокот на истражувањето е дека ниту транспорт ниту енергетика не се имуни на ваквите појави во Македонија. Она што загрижува, велат од организациите кои го спроведоа истражувањето, е што досега нема ниту еден целосно расчистен случај каде што постоеле наоди за корупција во последната деценија и повеќе, со што се потенцира неодложната потреба од тоа судиите и обвинителите кои работат на вакви специфични случаи од овие два сектора да добијат посебни обуки.

„Бидејќи двата сектора се капитално интензивни и зависат од странските финансиски институции, без обезбедување на правна сигурност нема да биде можен нивен брз раст, а со тоа и македонската економија и развој ќе трпат последици. Оттука, важноста не е само во правилното креирање на стратегиите и законите, туку и во обезбедувањето професионална, независна судска власт која ќе обезбеди владеење на правото, но и на правната сигурност при зделките и работењето во секторите транспорт и енергетика.

М.В