По повод одлуката на Владата на Република Македонија за објавување јавен повик за избор на членови на Советот за соработка помеѓу Владата на Република Македонија и граѓанскиот сектор објавен во Службен весник на РМ 98/2016 од 19 мај 2016 година, со изјава упатена до Владата се јавија 89 граѓански организации во која бараат:

– Да се запре процесот за избор на претставници од граѓанското општество во Советот за соработка помеѓу Владата и граѓанскиот сектор (Советот);

– Да се направат измени и дополнувања на донесената одлука за формирање на Советот и

– Да се отвори консултативен процес со претставниците на граѓанските организации, во кој различните мислења и ставови за Советот ќе бидат земени предвид и ќе бидат усогласени согласно споредбените искуства и практики.

Потпишаните граѓански организации сметаат дека со постапката на објавување на јавниот повик за избор на 13 членови на Советот за соработка, Владата не ги зела предвид препораките и укажувањата на организациите од граѓанското општество во врска со воспоставувањето на Советот и со тоа дополнително ја поткопала веќе кревката доверба меѓу државните институции и граѓанскиот сектор.

Понатаму, тие изјавуваат дека сакаат да ги афирмираат заложбите на граѓанските организации во контекст на донесената одлука, но и да ја информираат Владата дека нема да учествуваат во процесот на избор на членови на Советот од редот на граѓанските организации од следните причини:

– процесот на подготовка и усвојување на Одлуката не бил пропратен со соодветни и ефективни консултации со чинителите од граѓанското општество.

– во Советот е предвидена поголема бројност (мнозинска застапеност) на државни институции, наспроти претставниците на граѓанските организации што е спротивно на добрите меѓународни практики.

– предложеното ниво на државни службеници не е во согласност со добрите меѓународни практики каде што членовите во ваквите тела имаат раководни позиции и одлучувачки надлежности кои ќе обезбедат спроведување на предлозите на Советот во насока на унапредување на политиките за развој на граѓанското општество.

– предвидената постапка и начинот на спроведување на изборот на членовите на Советот од редот на граѓанските организации, а земајќи ги предвид кусите временски рокови и непрецизираните технички детали без обезбеден механизам за надгледување на процесот од страна на самите граѓански организации, го доведуваат во прашање фер изборот на членовите на Советот, и

– тековното целокупно општествено-политичко опкружување е изразено неповолно за формирање тело со ваков карактер и значење и предлагаме негово воспоставување во стабилна политичка ситуација.

На крај, тие наведуваат дека се надеваат дека Владата на Република Македонија сериозно ќе ги земе предвид нивните укажувања, а во спротивно остануваат на одлуката дека нема да учествуваат во процесот за избор на претставници од граѓанското општество.

Формирање на Совет за соработка помеѓу Владата на РМ и граѓанскиот сектор