УКИМ ги одбележува 70-годишниот јубилеј и Денот на светите Кирил и Методиј
Универзитетот „Св. Кирил и Методиј“ во Скопје денеска со повеќе активности ги одбележува 70-годишнината од своето основање и 24 Мај – Денот на сесловенските просветители свети Кирил и Методиј.
„Ова е голем ден не само за нашиот универзитет туку и за државата затоа што еден од главните столбови и стожери на државата е Универзитетот „Св. Кирил и Методиј“ во Скопје. УКИМ е најстар, најдобар и најголем универзитет во Републиката“, истакна ректорот на Универзитетот, Никола Јанкуловски, кој им порача на студентите и на професорскиот кадар да го продолжат епохалното дело на светите браќа Кирил и Методиј.
Во рамките на одбележувањето на патрониот ден и на годишнината, на најдобрите студенти на УКИМ им беа доделени награди и беше промовирана монографијата „Универзитетот „Св. Кирил и Методиј“ во Скопје 1949 – 2019“.
Универзитетот „Св. Кирил и Методиј“ во Скопје е првиот државен универзитет во Македонија, формиран во 1949 година со три факултети. Денес тој претставува заедница на 23 факултети, 5 научни институти, 4 јавни научни установи – придружни членки, 1 придружна членка – друга високообразовна установа и 7 придружни членки – други организации. Неговата дејност е уредена со Законот за високото образование и со Статутот на Универзитетот.
На Универзитетот „Св. Кирил и Методиј“ во Скопје постојат студиски програми во сите научни области – природно-математичките, техничко-технолошките, медицинските науки и здравствoто, биотехничките, општествените, хуманистичките науки и во уметностите. Истражувачката работа, освен на факултетите, се одвива и на научните институти во состав на Универзитетот.
Од своето основање до денес ректори на Универзитетот „Св. Кирил и Методиј“ во Скопје биле:
1949/50 – 1953/54 Кирил Миљоски
1953/54 – 1955/56 д-р Марин Каталиниќ
1956/57 – 1957/58 д-р Михаил Петрушевски
1958/59 – 1962/63 Блаже Конески
1963/64 – 1964/65 д-р Ѓорѓи Филиповски
1965/66 – 1966/67 д-р Ксенте Богоев
1967/68 – 1968/69 д-р Благој Попов
1969/70 – 1971/72 д-р Кирил Пенушлиски
1972/73 – 1973/74 д-р Стеван Габер
1974/75 – 1975/76 д-р Димитар Митрев
1976/77 – 1979/80 д-р Бранко Трпеновски
1980/81 – 1981/82 д-р Јован Стојановски
1982/83 – 1983/84 д-р Александар Андреевски
1984/85 д-р Христо Андонов-Полјански
1985/86 – 1987/88 д-р Тодор Џунов
1988/89 – 1989/90 д-р Јаким Петровски
1990/91 – 1991/92 д-р Драги Данев
1992/93 – 1993/94 д-р Томислав Чокревски
1995/96 – 1997/98 д-р Радмила Кипријанова
1998/99 – 2003/04 д-р Александар Анчевски
2004/05 – 2007/08 д-р Ѓорѓи Мартиновски
2008/09 – 2015/16 д-р Велимир Стојковски
2016/17 – д-р Никола Јанкуловски
М.В