Вицепремиерот и министер за финансии Зоран Ставрески поднесе оставка од своите функции во Владата поради здравствени причини.

Оставката Ставрески ја доставил до Владата, а портпаролот на Владата, Александар Ѓоргиев, за државната агенција МИА потврдува дека оставката е поради лични причини.

„Поради лични здравствени причини, вицепремиерот Ставревски поднесе оставка на функцијата министер за финансии и вицепремиер на Владата. Причините се наведени во текстот на неговата оставка и ние тоа го разбираме и го почитуваме. Владата истакнува огромна благодарност до вицепремиерот Ставревски за неговата работа, за ангажманот и за придонесот кој тој го оствари во реализација на владините мерки, програми и политики, за што сведочат неговите постигнати извонредни резултати. Му посакуваме пред сè добро здравје и надминување на предизвиците со кои се соочува, а Владата секогаш ќе остане отворена за соработка со личност каква што е тој“, вели Ѓоргиев.

Ставрески беше дел од владиниот тим уште од 2006 година на позицијата заменик на претседателот на Владата на Република Македонија задолжен за економски работи, а од 2009 беше заменик-претседател на Владата на РМ и министер за финансии.