Апелациониот суд Скопје до Основниот суд Скопје 1 – Скопје достави пресуда КОК Ж 63/15 со која по вторпат ја укина пресудата на Кривичниот суд КОК 8/08 – I од 16.1.2015 година за предметот во јавноста познат како „Змиско око 2“ и го врати предметот на повторно судење во Основниот суд.

Како што информираат од Кривичниот суд, постапувајќи по жалбите поднесени од 53 обвинети, изјавени лично или преку нивните бранители, како и по жалбата поднесена од Основното јавно обвинителство за гонење организиран криминал и корупција против првостепената пресуда, второстепениот суд ги уважил жалбите на обвинетите и делумно ја уважил жалбата на Обвинителството.

„Апелациониот суд, постапувајќи по изјавените жалби, одржал јавна седница на ден 19.2.2016 и 22.2.2016 година по која утврдил дека во првостепената пресуда нецелосно е утврдена фактичката состојба, односно дека обжалената пресуда во осудителниот и ослободителниот дел од став I точка 1 и став III содржи недостатоци поради кои не може да се провери нејзината правилност во целост, а изреката на пресудата е недоволно јасна, поради што Апелациониот суд ги уважил жалбите и предметот го врати на повторно судење со упатства  да се отстранат недостатоците“, велат од Кривичниот суд.

Во однос на жалбата на Обвинителството за осудителниот дел од став I на пресудата, Апелациониот суд сметал дека таа е беспредметна.